AMI PAMODI BO, MUDJER!

Ka ten rotxa

nen rua nu
nen séu largu
nen asa fitxadu
di un naufragu
perdidu na mi
si ka ten sal
ki pari di bu boka

Ka ten lua
nen kantu di grilu
nen txabi di noti
nen txota na strela
nen jaula vaziu
di gritu di lumi
nen paz di bedju
nen rikeza di juventudi
si na mi ka tem bo

Ka ten loukura na ora

nen tetu na paredi
nen fumu na pintura
nen fardu na luz
nen tiston na sulada
nen vos di pueta
nen kaldu na tabua
nen letra na linha
si bu voz ka fala

Ka ten mi
si ka tem bo
na mi e bo
na bo e so sábi
si sábi ka dueu
na mi e ta mora
ti ki anu kontra
na sola di mundu
ki bai anu pasadu
xeiu di sábi
k es anu nu renova
na saltu d odju
sen sátira di agu
sen purfumu di kor

So mi ku bo
na mi e bo
i nos dos na mundu
ku bensu di Deus

By Johnny Pina, in "O que vai na Alma"